庚寳二候時

17/06/2007


游乃海要求徐子珊跑步減肥。

徐子珊和游乃海十分投契，無所不談。



游乃海大讚徐子珊表現不俗，領悟力強。

徐子珊競選港姐時穿上泳裝，身材出眾。 資料圖片

徐子珊跟游乃海互相奉獻第一次。第一次拍電影就當上女主角的徐子珊，跟第一次執導就憑《跟蹤》成為香港國際電影節開幕電影、柏林影展觀摩電影的游乃海，今次相聚，二人不約而同感激杜琪峯，有耐性地給予他們的第一次。

徐：徐子珊 游：游乃海

徐：你之前喺TVB做嘢？
游：89年，TVB搞咗個訓練班，好似一間訓練學校咁，有編劇訓練、演員訓練、武術訓練同副導訓練。

徐：你係咪好細個已經鍾意寫嘢同投稿？
游：其實我之前冇玩過話劇，直至F.6，突然間好想做編劇，我自細鍾意睇金庸小說、睇漫畫，喺屋企講古仔，當我睇咗一本書叫《人！阿人》，我覺得好感動，好想將呢個古仔變成劇本。

第一印象

徐：其實我都可以寫書，寫港姐入門。
游：我覺得幾好彩，有機會Interview，當日係鄧特希In我，佢要我即場寫古仔，我當時都唔知自己得唔得，但事後我問過鄧特希，點解會要我？佢就話基本上係第一個印象，之後入咗TVB，做咗3年，92年底，杜琪峯叫我出去幫佢，我即刻應承。

徐：我想問拍電影嘅題材，由你決定或係投資者嘅意見？
游：應該係導演嘅意見，好似《跟蹤》，杜琪峯叫我畀題材佢，我之前睇雜誌、報紙，睇到有關C.I.B，即係香港刑事情報嘅報道，覺得好有趣，加上識得警察朋友，所以就用嚟做第一套戲嘅題材。

青春可愛

徐：其實我好想知道，點解你會搵我拍呢套戲？
游：你啲角色本來諗住用男仔，後來覺得由女仔做會好睇啲，睇到你拍嘅廣告，覺得幾好，同觀眾幾貼，幾鄰家。有一幕推船，我見你咬緊牙關個樣，覺得你好硬淨，肥肥哋咁，都幾得意。

徐：好少人形容我肥肥哋，可能我塊面顴骨大，笑起上嚟有舊肉，好小朋友咁。
游：咁先啱個角色。

徐：係你推薦我畀杜琪峯？
游：佢做你嗰屆嘅港姐評審，當時對你已經有印象，而我覺得你好Young好Green好新，配合到角色性格。

勒令瘦身

徐：你第一眼見到我，覺得我點呀？
游：我覺得點解你會腫咗咁多？

徐：嗰時係肥啲。
游：我叫你去減肥、跑步。

徐：我有去跑步，因為電影入面講我要追人，我咪練跑，當時導演冇叫我減肥嘅！講開又講，點解你哋咁有信心搵我拍戲？
游：我哋有搵你試戲，嗰段戲好難做，係鄭秀文嘅《我左眼見到鬼》入面一場戲。

徐：我要演鄭秀文喺泳池邊一段獨白戲。
游：你當時喊出嚟，做咗兩個Take，兩個Take都好戲�鳎�我同你講，要自然啲，你又明我講乜，對一個新人嚟講，好多人唔知自己做緊乜，有啲甚至會落閘。

多謝包容

徐：拍完套戲，我嘅表現點？
游：OK啦！你當時成日都好眼瞓，不過錯有錯着，你有時懵吓懵吓，同個角色又好配合，我知道你好攰，好多時拍完電視劇先嚟開工。

徐：有時都幾慘，自己好想拍好啲，但力不從心，記唔記得有一場戲，你叫我對眼用力啲，我同你講已經用晒力。
游：我諗你當時太攰。

徐：加上當時好淡妝，對眼真係冇乜神，其實監製杜琪峯對我有乜Comment？
游：佢冇講你唔好喎！

徐：杜琪峯冇鬧過我，反而鼓勵我，佢同我講：「阿女唔緊要，有咩咪Retake過，都知你係新人。」

游：杜琪峯後來睇片，覺得有啲地方麻麻哋，都叫我哋Retake過。
徐：佢哋對我哋兩個都好包容。

游：我都覺得好好彩，片主又冇催，杜琪峯好支持，拍完部戲，叫人睇完畀意見，期間我又去咗搞《放逐》，之後先再去補10日戲。